Presidenti i Serbisë, Aleksandër Vuçiç ka deklaruar se njohja e Kosovës nga Izraeli ishte një zhgënjim për Serbinë. Të martën gjatë një bisede telefonike me Presidentin izraelit Isak Herzog, Vuçiç shprehu dëshirën e tij që Serbia të përmirësojë marrëdhëniet me udhëheqjen e re izraelite. “Presidenti Vuçiç shprehu gatishmërinë që Presidenti Herzog dhe Izraeli të vazhdojnë të mbështesin dialogun midis Beogradit dhe Prishtinës, si mënyra e vetme për të zgjidhur, për Serbinë, çështjen e ndjeshme të Kosovës dhe Metohisë”, thuhej në deklaratë pas një bisede telefonike.
Kosova hapi zyrtarisht ambasadën e saj në Jerusalem më 14 mars 2021. Ministri në detyrë i Punëve të Jashtme të Kosovës Besnik Tahiri deklaroi në një konferencë për shtyp në Prishtinë se njohja e Izraelit është një nga më të rëndësishmet që Kosova ka marrë që nga shpallja e pavarësisë në vitin 2008. Marrëveshja për vendosjen e marrëdhënieve diplomatike midis Izraelit dhe Kosovës është pjesë e marrëveshjes ekonomike në Uashington e nënshkruar më 4 shtator 2020.
