Kryeministri Edi Rama ka reaguar për ambasadorin rus në Beograd që vizitoi dje njësitë ushtarake të Serbisë, që janë mobilizuar në kufi me Kosovën. Në konferencën e përbashkët me kryeministrin Kurti, Rama tha se kjo është “shkrepësja që ndez institucionet”. “Ato djegiet e institucioneve nuk i provokojnë forcat legjitime të qeverisë së Kosovës por marrja peng e serbëve në Kosovë në kushtet e një dialogu që nuk ecën ashtu si duhet.
Jam i bindur që dialogu është e vetmja rrugë. Çfarë do ambasadori rus? Imagjinoni që ambasadori amerikan të shkonte në kufi. Ky është një teatër. Është shkrepësja që ndez institucionet”, tha Rama.
Ministri serb i Mbrojtjes, Nebojsha Stefanoviç, i shoqëruar nga shefi i shtabit të përgjithshëm të ushtrisë serbe, Milan Mojsiloviç dhe ambasadori rus në Beograd, Aleksandar Bocan Kharchenko, vizituan dje njësitë serbe në Rashkë, në afërsi të kufirit në Jarinjë. Vizita erdhi në një moment kur situata është mjaft e tensionuar pas bllokimit të pikave doganore prej një jave.
