Bullgaria konfirmoi veton e saj për nisjen e bisedimeve të anëtarësimit midis Bashkimit Evropian dhe Maqedonisë së Veriut, gjatë një takimi të Këshillit të Çështjeve të Përgjithshme të BE-së, duke thënë se vendi ende duhet të përmbushë kriteret për të zhbllokuar procesin, thuhet në një deklaratë të Ministrisë së Punëve të Jashtme bullgare, sipas bne.eu.
Aktualisht, përparimi i Maqedonisë së Veriut dhe Shqipërisë ka ngecur për shkak të vetos së Bullgarisë për fillimin e negociatave të anëtarësimit me Maqedoninë e Veriut, lidhur me çështjet dypalëshe gjuhësore dhe historike.
“Fatkeqësisht, Republika e Maqedonisë së Veriut ende nuk i përmbush kriteret për zhvillimin e konferencës së parë ndërqeveritare”, tha pas takimit ambasadori i Bullgarisë në BE, Rumen Aleksandrov.
Ai shtoi se Shqipëria duhet të vlerësohet veçmas nga Maqedonia e Veriut, bazuar në arritjet e saj. Aktualisht, procesi i dy shteteve është i lidhur së bashku dhe vetoja e Sofjes ndaj Shkupit bllokon fillimin e bisedimeve të anëtarësimit në BE edhe me Shqipërinë. Aleksandrov gjithashtu vuri në dukje se Bullgaria ka propozuar disa opsione për tejkalimin e çështjeve me Maqedoninë e Veriut lidhur me të drejtat e banorëve me kombësi bullgare si dhe me zbatimin e traktatit të miqësisë të nënshkruar mes dy shteteve.
“Partnerët tanë në Republikën e Maqedonisë së Veriut duhet të marrin angazhime specifike detyruese, një pjesë e të cilave të përmbushet në afat të shkurtër dhe pjesa tjetër të përfshihet në kërkesat e kornizës së ardhshme të negociatave. Derisa kjo të ndodhë, nuk mund të pritet përparim në procesin e zgjerimit me Republikën e Maqedonisë së Veriut”, tha Aleksandrov. Bullgaria ka qenë nën presionin ndërkombëtar për të zhbllokuar fillimin e bisedimeve të anëtarësimit në BE me Shqipërinë dhe Maqedoninë e Veriut.
Edhe senatorët e SHBA Klaudia Tenney dhe Uilliam R. Keating, të dy anëtarë të Komitetit të Punëve të Jashtme të Dhomës së Përfaqësuesve, i kërkuan Sofjes të gjente një kompromis dhe të zgjidhte situatën. Në një letër drejtuar ambasadorit të Bullgarisë në Uashington, Tihomir Stoytchev, ata shkruanin se bllokimi i mëtejshëm i procesit do të hapte derën për ndikim më të fortë rus dhe kinez në rajon.
