Kryeministri i Kosovës, Albin Kurti ka reaguar sërish ditën e sotme për tensionet e krijuara ditën e djeshme në veri të vendit. Nëpërmjet një reagimi në rrjetet sociale, Kurti shkruan se i kupton shqetësimet e ndërkombëtarëve dhe reagimet e tyre, por sqaron se forcat e policisë së Kosovës kanë bërë thjesht detyrën pasi ditën e djeshme siç edhe e përcakton ligji kryetarët e rinj të komunave duhej të nisnin punën në zyrat e ndërtesave komunale.
Nga ana tjetër sot presidenti i Serbisë, Aleksandër Vuçiç rreth orës 10:00, ka mbledhur Këshillin e Sigurisë Kombëtare për tensionet e ditës së djeshme në veri të Kosovës ku protestues serbë u përplasën me forcat speciale që tentuan të fusin në zyrë kryetarët e rinj të komunave të Leposaviçit, Zubin Potokut dhe Sveçanit. Në seancë marrin pjesë të gjithë krerët e shtetit serb.
Lajmin për mbledhjen e Këshillit të Sigurisë, Vuçiç e dha ditën e djeshme gjatë mitingut të organizuar në qendër të Beogradit si kundërpërgjigjie ndaj tensioneve në veri. Ai tha se situata në Kosovë nuk kishte qenë kurrë më e trazuar se aktualisht.
Ndërsa kujtojmë se ditën e djeshme, nëpërmjet një urdhri shpalli edhe gatishmërinë ushtarake të Serbisë dhe zhvendosi trupat e ushtrisë pranë kufirit me Kosovën.
Ngjarjet e ndodhura ditën e djeshme ku mbetën të plagosur edhe 5 efektivë të policisë së Kosovës pas përplasjeve të dhunshme me protestuesit, sollën reagim të menjëhershëm të ndërkombëtarëve të cilët i cilësuan si provokim veprimet e Forcave Speciale për të futur në zyrë kryetarët e rinj të komunave.
SHBA dhe BE i bënë thirrje kryeministrit të Kosovës Albin Kurti që të ndalte provokimet dhe veprimet e dhunshme në veri të Kosovës. Në një deklaratë të DASH, Kurti paralajmërohet se pas kësaj ngjarje do të ketë pasoja në raportet SHBA-Kosovë.
Ndërsa kreu i ekzekutivit të Kosovës, Albin Kurti dhe presidentja Vjosa Osmani ruajtën një linjë reagimi duke u përgjigjur ndaj deklaratave se policia në veri të vendit por kryente detyrën duke ruajtur dhe mos lejuar cënimin e integritetit territorial.
