TIRANË- Autoriteti Rrugor Shqiptar ka dhënë një përditësim të përgjithshëm për situatën nga moti i keq që ka përfshirë vendin që nga dita e djeshme.
Sipas njoftimit, gjatë natës ka rënë intensiteti i reshjeve të dëborës në zonën Veriore dhe është rritur në zonën Juglindore. Në zonat malore temperaturat janë ulur deri në -11 gradë celsius, ndërkohë që qarkullimi vijon pa probleme.
POSTIMI I PLOTË:
Gjatë natës ka rënë intensiteti i reshjeve të dëborës në zonën Veriore dhe është rritur në zonën Juglindore si në Qafë Thanë-Korçë, ku në pjesën Qafë Thanë-Doganë ka pasur erë të fortë Zëmblak-Dogana Goricë, Korçë-Ersekë, Korçë-Dogana Kapshticë, në Dardhë dhe në Voskopojë.
Temperaturat kanë qenë në ulje duke shënuar deri në -11 °C në zonat malore.
Grupet e punës me mjetet borëpastruese në terren kanë bërë pastrimin e rrugëve nga dëbora dhe shpërndarjen e kripës për të evituar ngricat.
Qarkullimi vijon pa probleme.
Drejtuesit e mjeteve të pajisen me goma dimërore dhe zinxhirë kur udhëtojnë për në segmentet me prezencë dëbore, të ulin shpejtësinë, të respektojnë sinjalistikën dhe udhëzimet e Policisë Rrugore.
