Shqipëria është bërë anëtarja më e re, në Drejtorinë e Çelësave Publikë, të Organizatës Ndërkombëtare të Aviacionit Civil, duke shënuar një tjetër hap të rëndësishëm për sigurimin e dokumenteve të udhëtimit.
Kjo do të thotë se autenticiteti i pasaportës shqiptare do të njihet nga të gjitha 193 shtetet pjesëtare të Organizatës Ndërkombëtare të Aviacionit Civil dhe do të mundësohet kalimi kufitar në pikat automatike.
Për qytetarët shqiptarë, përmirësohet përvoja në udhëtimet ndërkombëtare, duke e bërë më të lehtë dhe të shpejtë kalimin në pikat doganore, ku verifikimi i pasaportës do të bëhet nëpërmjet konfirmimit të certifikatës së saj digjitale.
Anëtarësimi i Shqipërisë, si vend I 99-të, në Drejtorinë e Çelësave Publikë, rrit ndjeshëm sigurinë kufitare, ndihmon luftën kundër krimit të organizuar dhe terrorizmit në nivel global.
Drejtoria e Çelësave Publikë është një platformë globale për shkëmbimin e informacionit mbi dokumentet e udhëtimit, duke ndihmuar vendet anëtare në verifikimin e pasaportave biometrike.
