Partia Demokratike e Kosovës (PDK) ka ndryshuar udhëheqjen e saj këtë të hënë gjatë Konventës së 12-të të partisë. Bedri Hamza është zgjedhur kryetari i ri i PDK-së, duke marrë drejtimin e partisë nga Memli Krasniqi.
Në fillim të Konventës, Memli Krasniqi njoftoi dorëheqjen e tij nga pozita e Kryetarit të PDK-së, një detyrë që e mbajti për 4 vjet e 4 muaj.
Para delegatëve, Krasniqi e cilësoi detyrën e kryetarit si “nderin më të madh” të jetës së tij politike, duke theksuar se po largohet “me mirënjohje, me krenari, me paqe.”
Duke argumentuar vendimin, ai theksoi se PDK-ja ka nevojë për një “energji dhe momentum të ri” dhe për një udhëheqës që njëkohësisht do të jetë kandidat për kryeministër në zgjedhjet e ardhshme nacionale.
“Nuk po largohem prej lodhjes apo zhgënjimit. Po e bëj këtë nga përgjegjësia… sepse besoj që shtëpia jonë është mjaftueshëm e fortë për t’u ngritur në lartësi të reja,” tha Krasniqi, duke shtuar se e lë partinë “më të fortë se sa e kishte gjetur.”
Ai vlerësoi arritjet gjatë mandatit të tij, duke përmendur ringritjen e PDK-së me fitore në disa komuna kyçe dhe rikthimin në rolin e forcës kryesore opozitare.
Pas njoftimit të dorëheqjes, delegatët e partisë zgjodhën Bedri Hamzën, i cili tani pritet të udhëheqë PDK-në drejt sfidave të reja zgjedhore.
