Kryeministri Edi Rama ka theksuar rëndësinë e sigurisë ushqimore dhe përafrimit me standardet e Bashkimit Evropian, duke e cilësuar këtë si një sfidë madhore të procesit të anëtarësimit të Shqipërisë në BE.
Rama u ndal në domosdoshmërinë që produktet shqiptare të jenë jo vetëm të sigurta për konsumatorët, por edhe të pranuara e të suksesshme në tregun e përbashkët evropian.
“Në një takim të organizuar me operatorët e sipërmarrjes ushqimore, ne u ndalëm në një temë shumë konkrete. Si do të garantojmë që çdo produkt që konsumojnë qytetarët, jo thjesht të jetë i sigurt, por të jetë një produkt i pranuar dhe i suksesshëm në tregun e nesërm të përbashkët të Evropës, ku ne do të jemi anëtarë me të drejta, por edhe me detyrime të barabarta. Dhe kjo lidhet me një sfidë aktuale më të ndërlikuar të procesit tonë të anëtarësimit në Bashkimin Evropian, që është sigurimi i të nesërmes për të gjithë ata, të cilët kanë ndërtuar të sotmen mbi themelet e një pike grumbullimi, përpunimi apo prodhimi të nënprodukteve ushqimore, që do të thotë që nga gjëja e gjallë deri te produktet e paketuara”, tha Rama.
Kryeministri theksoi se Shqipëria nuk duhet të kufizohet vetëm në harmonizimin ligjor me BE, por të sigurojë zbatimin konkret të ligjeve në praktikën e përditshme. Ai shtoi se bashkëpunimi me sipërmarrësit në bujqësi është thelbësor për suksesin e këtij procesi.
Rama e cilësoi sigurinë ushqimore si një mision kombëtar, i lidhur drejtpërdrejt me shëndetin e qytetarëve dhe me objektivin e Shqipërisë për t’u bërë anëtare e Bashkimit Evropian në vitin 2030.
“Një proces që shpesh keqkuptohet si një listë detyrash që duhen përmbushur për të tjerët, ndërkohë që në thelb është diçka që lidhet drejtpërdrejt, jo thjesht vetëm me shëndetin e shqiptarëve këtu në Shqipëri, e konsumatorëve këtu në Shqipëri, por edhe me misionin tonë të përbashkët kombëtar të Shqipërisë në Bashkimin Evropian në vitin 2030. Nuk është një çështje rregullash në letër, është një çështje e ndërtimit bashkërisht të një sistemi funksional prodhimi, kontrolli, cilësie dhe besimi në çdo hallkë.
Në këtë fazë, Shqipëria nuk bën vetëm harmonizimin ligjor me Bashkimin Evropian, por edhe duhet të sigurojë zbatimin konkret të ligjeve në realitetin e përditshëm. E prandaj, ne po ndërveprojmë dhe do të ndërveprojmë gjithmonë e më aktivisht me sipërmarrësit dhe sipërmarrjet në bujqësi, sipërmarrësit dhe sipërmarrjet që kanë të bëjnë me produktet shtazore dhe nënproduktet e tyre, sipërmarrësit dhe sipërmarrëset që kanë të bëjnë me gjithçka që sot del nga toka e Shqipërisë, falë punës dhe duarve të tyre të arta”, tha Rama.
