Jesy Nelson ka rrëfyer e prekur se vajzat e saj binjake janë diagnostikuar me një sëmundje gjenetike që mund të jetë fatale.
Në një video ku shfaqet e trishtuar, ish-anëtarja e Little Mix thotë se vajzat e saj kanë trajtën më të rrallë të një sëmundjeje të humbjes së muskujve dhe pa trajtim mund të vdesin pa mbushur dy vjeçe.
Jesy shpërtheu në lot teksa tregoi sesi u zbulua diagnoza. Sëmundja quhet SMA Tip 1 ose Ëerdnig-Hoffmann dhe është forma më e rëndë e Atrofisë Kurrizore Muskulare.
Sëmundja shkakton dobësi të theksuar të muskujve, probleme të frymëmarrjes dhe gëlltitjes dhe mund të jetë vdekjeprurëse pa trajtim.
Binjaket Ocean Jade dhe Story Monroe lindën para kohe, kur ishin 31-javëshe. Këngëtarja tha se ishte nëna e saj që shfaqi shqetësim pak pasi vajzat erdhën në jetë.
“Para disa muajsh mamaja ime vuri re se vajzat nuk po lëviznin sa duhet me këmbë. Për mua s’ishte shumë shqetësuese sepse sapo lashë kujdesin intensiv neonatal, më thanë foshnjat e tua janë prematurë kështu që mos i krahaso me të tjerët. Ato nuk do të kenë të njëjtat arritje, pranoji siç janë dhe do të shkojnë ku duhet të jenë kur ta bëjnë.”
Jesy tha se mjekët thanë se edhe mjekët i kishin cilësuar bebet si “të shëndetshme”, por kur çifti u shqetësua për ushqimin e tyre, i këshilluan sërish ta merrnin me lehtësi.
Diagnoza u mësua pas 3-4 muajve me vizita të vazhdueshme. “Ne duhet të firmosnim shumë formularë para se të diagnostikoheshin. Kur i vizituan, na thanë se ato ndoshta nuk do të ecin dot kurrë. Me gjasë nuk do ta rifitojnë kurrë forcën në qafë, kështu që do të jenë invalide. Më e mira që mund të bëjmë tani është t’i trajtojmë dhe të shpresojmë.”
Nelson tha se vajzat, të cilat janë 7-muajshe e gjysmë, e kanë marrë trajtimin.
“Më duket sikur më është dashur të bëhem infermiere brenda dy javësh”, shtoi ajo dhe shpjegoi se vajzat marrin frymë përmes aparaturave. “Ndihem sikur jeta ime ka marrë një kthesë 360 gradë.”
Megjithatë, ajo vazhdon të shpresojë se vajzat do t’ia dalin mbanë.
