Kryeministri i Kosovës, Albin Kurti për mes një postimi në llogarinë e tij në “Facebook” ka përkujtuar masakrën e Krushës së Madhe dhe Krushës së Vogël, ku u vranë mbi 300 civilë.
Kurti në postimin e tij ka ndarë pamje nga varret e të rënëve në këtë masakër ndërsa shkruan se Serbia realizoi planin gjenocidal për shfarsjen e shqiptarëve në Kosovë. Si më tej shtoi se gra dhe fëmijë u detyruan të largoheshin drejt Shqipërisë ndërsa burrat dhe djemtë i ndaluan ku iu konfiskuan letërnjoftimet dhe artikujt me vlerë.
“Në pranverën e vitit 1999, Serbia po realizonte planin gjenocidal “Patkoi” për shfarosjen e popullsisë shqiptare vendase në Kosovë. Në paraditën e 26 marsit, forcat e Serbisë sulmuan fshatrat Krushë e Madhe dhe Krushë e Vogël. I detyruan gratë dhe fëmijët të largoheshin për në Shqipëri. Burrat dhe djemtë i ndaluan. Ua konfiskuan letërnjoftimet dhe artikujt me vlerë. Pastaj hapën zjarr me mitraloz mbi ta. Të shtënat zgjatën disa minuta. Atë ditë, forcat serbe vranë 243 civilë shqiptarë në masakrën në Krushë të Madhe dhe 113 në Krushë të vogël.”
Ai ka përkujtuar edhe masakrën në familjen Berisha në Suharekë, ku u vranë 48 anëtarë të familjes Berisha, përfshirë 11 fëmijë.
“Në orët e hershme të mëngjesit të 26 marsit, tanket serbe rrethuan oborrin e familjes Berisha në Suharekë. I dëbuan familjarët nga shtëpitë dhe i çuan në një kafene. Pastaj hapën zjarr. Hodhën edhe eksplozive. Forcat serbe aty i vranë 48 anëtarë të familjes Berisha, përfshirë 11 fëmijë. Mes tyre, Dorentinën 3 vjeҫare, Ismetin 2 vjeҫar, ndërsa Eroni dhe Redoni ishin vetëm 1 vjeҫ. Trupat e tyre u dërguan në varrezë masive në Batajnicë, afër Beogradit. Kësaj masakre i mbijetuan vetëm Shyhrete Berisha dhe Vjollca me të birin, Gramoz Berisha,” shkruan më tej Kurti.
Në të njëjtën ditë, Kurti ka thënë se forcat serbe sulman fshatin Padalishtë të Skenderajt, duke masakruar 19 anëtarë të familjes Imeraj, fshatin Landovicë të Prizrenit ku u vranë 23 banorë ndërsa në Gjakovë u vranë 6 burra.
“Po atë mëngjes, forcat serbe e sulmuan fshatin Padalishtë të Skenderajt, duke masakruar 19 anëtarë të familjes Imeraj, nga mosha 2 deri 76 vjeçe. Në mesin e tyre 11 gra dhe pesë fëmijë. Në Landovicë të Prizrenit, më 26 mars 1999, u vranë 23 banorë të këtij fshati dhe fshatrave tjerë, përfshirë gjashtë fëmijë dhe një grua shtatzënë. Në mbrëmje, në qytetin e Gjakovës, në një shtëpi në rrugën “Ymer Grezda”, forcat e Serbisë vranë me armë zjarri të gjashtë burrat shqiptarë që ishin në atë shtëpi.” përshkuan masakrat e serbëvë kryëministri i Kosovës.
Kurti më tej në shkimin e tij thotë se këto masakra janë dëshmi të gjenocidit të Serbisë.
“Këto janë dëshmitë e gjenocidit të Serbisë, që me forcat policore e ushtarake, u përpoq të shfarosë shqiptarët në Kosovë. “Kujtesa e Kosovës” titullohet vëllimi i librave me dëshmitë e rrëfimet të mbijetuarve të masakrës së Krushës së Madhe, që u promovua mbrëmë, me mbështetjen e Ministrisë së Kulturës, Rinisë dhe Sportit. Kujtesa e Kosovës është e freskët.”
